امتحان الماث

انا كل يوم هحط الامتحان بتاعي كان عامل ازاي

اوك

نبدا بالماث

كان وحش :( :( :( :(
مع ان دي اكتر مادة احنا فاهمينها
اكتر مادة الكل كان منشكح منها
ربنا يستر عالباقي
اخر تلات محاضرات كانو متكروتين جدا
خدنا كمية معلومات مهولة ومخدناش امثلة كتير عليهم
والامتحان كان مركز عليهم

قل لن يصيبنا الا ماكتب الله لنا

ربنا يستر عالانجليزي بقى
وانا لاافقه شيء في المادة دي
يارب سترك يااااااااااااارب

شكرا لنقاء قلوبكم الامتحان كان حلو

بجد شكرااااااااااا

وجزاكم الله خيرا

وحقق الله كل امنياتكم

بجد لما كتبت البوست (حالة فشل ) كانت الدنيا سودا جدا في وشي

بجد انا بشكر كل الناس اللي ردت لي هنا في المدونة

أو الناس اللي ردولي على المسن

والناس اللي دعت لي بجد

وقبل ده انا بشكر ربنا اللي رزقني بناس زيكم

الحمد لله الامتحان كان نايس خالص وحسيت كدا ان ربنا فتحها عليا الحمد لله

ودكتور حمد قعد يهزر معايا لأني جيتلو متأخرة عشان كنت بناقش اللبروجكت بتاعي

فقال لي خلاص ابقي تعالي لنا السنة الجاية بقى أصل دي اخر لجنة ومافيش لجنه بعدها :D:D:D

انا بصيت لو كدة بزهوووووول

وبعدين ضحك وقال لي يلا هندخلك عشان انتي قصيرة بس

ومش هنلاقي اقصر منك :))

ودخلني المعيدات بصو لي كدة مستغربين

قاال لهم لاااااااااااا محدش يقو لها حاجة عشان دي اقصر وحدة هنا

قعدوها في مكان حلو كدة واسألوها اخر وحدة

الحمد لله جالي سؤال حلو

ودكتور منال(معيدة عندنا انا شخصيا بخاف منها اكتر من دكتور حمد نفسو) كانت لتشيفه خالص معايا

وقاعدة تقول لي ايوة ياحبيبتي

خلصتي ياماما

وعمالة تسألني بهدوووووووووء خالص مع ان الولد اللي قبلي ياعيني كانت عاصراه :D:D:D

<<< تفرقه عنصرية بقى

وبعدين جات دكتور نهى (معيدة تانية )تبص على السيركت اللي انا ركبتها قالت لي انتي شطورة خالص :O:O

مش عارفه كانت شايفاني نونو ولا ايه؟؟

هاه يابنوته ارسملي ال V ouput كدة

المهم خدت A في العملي والشفوي وخلصت من عملي الالكترونكس

يارب عقبال الفيزياء

وعقبال بقيت المواد

ويارب ربنا يوفقكو كلكو كلكو

حالة فشل

سلام
بجد بجد أنا مخنوقة موووووووووت
الأسبوع ده بدأنا امتحانات العملي

قعدت يوم الجمعه قبل امتحان البرمجة معملتش فيه حاجة
ماتفهموش ليه
مازاكرتش وبس ماعلينا أنا أساسا كنت متابعه المادة دي لأني ياخد فيها كورس وكمان اشتغلت بروجكت كويس الحمد لله بس اللي بجد غايظني جدا من نفسي أن انا مابقتش ازاكر خااااااااالص
انا عندي بكرة امتحان الكترونكس عملي
ومازاكرتش
ايوه مازاكرتش
ومحدش يسألني ليه
لأني نفسي أنا مش عارفه ليه مبقتش ازاكر مبقتش قادرة أسيطر على نفسي واقعد اقرالي كلمتين ينفعوني
حاسه بفشل فظييييييييييييع
حاسه باحباط مش بطبيعي
انا أصلا ماكنتش كدة
أنا زمان كنت بستمتع بالمزاكرة
ايوة كنت بستمتع لما امسك الكتاب وازاكر
دلوقتي بقيت انسانه فاشله خالص
مش عارفة ازاكر أو بمعنى اخر مش قادرة أزاكر
مش عارفه انظم وقتي ولا انظم حياتي ولا اعمل اي حاجة مفيدة
مجرد وحدة كدة عاله عالمجتمع وعالة على اهلها
انا بجد ببقى مكسوفه من نفسي لما بابا أو ماما يتصلو بيا عشان يعرفو عملت ايه
ببقى مكسوفه وانا بقول لهم ان الامتحان كان يعني واني محلتش حلو أوي
ببقى مكسوفه لما اشوف النعم اللي عندي وربنا مغرقني بيها وانا مش مقدراها
ببقى مكسوفه لما اشوف وسائل الرفاهية اللي متوفرالي من الناس اللي حواليني وانا بقلة مزاكرتي دي بخزلهم جدا
ببقى مكسوفه لما اطلب من بابا أو ماما أي طلب ومايقولوش لأه وأنا برضو بخزلهم

طول الوقت قاعدة في اوضتي مابعملش حاجة
يا اما بعيط ياما فاتحة نت يا اما ببص على المادة اللي عليا بكرة
وهما برى الغرفة متخيلين ان انا يعيني بزاكر ومحدش بيدخل عليا
وعمي النهاردة بيقول لي يابنتي انتي دايما كدة قاعده في الأوضة حابسة نفسك اخرجي كدة برى
اتكلمي شويه نفسي شويه ويعدين ادخلي كملي مزاكرتك
كنت هعيط من كلامو
أنا فعليا مش بزاكر وهما متخيلين اني مقطعه نفسي مزاكرة
زمان قبل الاختبار كنت بدعي يارب مغلطش ولا غلطة
دلوقتي بدعي واقول يارب اقدر ازاكر
انا حقيقي متضايقه جدا من نفسي
ياريت كل اللي يقرا البوست ده يدعي لي
يدعي يقول يارب ياسمين تعرف تزاكر

هييييييه خلصنا البروجكت

هيييييييييييييييييييييييييه
اخيرا خلصنا البروجكت
بعد معاناه وتهييس وعياط
وبعد مانص دستة معيدين ساعدونا فيه على رأي سمر
بس الحمد لله اهو خلص
وكتبنا الريبورت بتاعو
وطبعنا الريبورت بتاعو كمان
أي أوامر تانيه يا باشا
:D:D:D:D
بس مش حاسة اني فرحانة أوي بيه
حاسة ان الريبورت قصير
اصل احنا عاملينو واحنا بنفصل شحن كنا في الكليه من 8 الصبح وكتبنا الريبورت الساعه 6 المغرب
فكنا تعبانين وفاصلين وزهقانين وحررررررررر
الاكستنشن حر مووووووووت وخنقه
بس اهو خلصنا منو وانا حاسة انو لم لنا حاجات كتير
الحمد لله
بس بجد أنا عاوزة اشكر سمر عشان هيا اكتر وحدة تعبت معانا في البروجكت ده
هيا اكتر وحدة اشتغلت فبه وهيا اللي كانت عماله تشجعنا طول الوقت وتشع فينا روح الأمل والتفاؤل
بجد بجد بجد ياسمر شكرا وربنا يكرمك ويخليكي لينا عشان انتي بجد بنت جامدة وجدعه
وصاحب صاحبك بجد
يووووو قصدي صاحبة صاحبتك

وعاوزة اشكر دكتور مفيد عشان هوا ساعدني جدا في ال ++C وفي البروجكت
بجد ياجماعه انا كنت عاوزة أسيب الكلية وبفكر جديافي الموضوع ده بس لما اتكلم معانا حسسني ان الدنيا بخير وخلاني غيرت نظرتي بجد
وبجد بجد هوا اللي خلاني اعرف اكتب كود
بجد بجد بجد شكرا يادكتور

وكمان دكتور كريم جه ياجماعه بص لنا عالبروجكت دقيقة وشال لنا كل الارور :O:O:O:O
الله أكبر الله أكبر اللهم لا حسد

ودكتو محمد سامي قعد معانا حوالي ربع ساعه بس قال لنا فيها حاجات كتييييييييييييييير أوي ساعدنا بجد
بجد بجد الدكتور ده دماغو عاليه أوي

ودكتور كمان أنا مش عارفه اسمو بس برضو ظبطنا في شوية حاجات

كان منظرنا تحفة واحنا عمالين نتسول معيدين في الكلية
بس الحمد لله محدش كسفنا منهم :D:D
وكانو بيساعدونا مساعده جدية بجد ربنا يكرمهم كلهم

يارب بس ناخد درجة حلوة عالبروجكت
ويارب اعرف أحل حلو في امتحان العملي والنظري في كل المواد
أصلي طماعه في الدعاء جدا :] :]

تهييس يوم التلات

أول مرة فحياتي أهيس التهيييس ده
يوم التلات كان عندي كورس أنا وسمر وبعد الكوس روحنا الكليه عشان نكمل البروجكت بتاعنا
رحنا الجامع عشان يبقى هادي ومكانش وقت صلاه رحنا صلينا الضهر وبدأنا
أول حاجة أنا قعدت أعيط عشان المفروض كنا نكون مخلصين البروجكت النهاردة وناقصلنا فنكشن وحدة بس نسأل عليها لمعيد
بس اللي حصل اني لاقيت الدنيا متلخبطة
ولقيت سمر حاطة البروجكت كلو رموز x;y;zومفيش حاجة مفهومة
وقعدت قدام اللاب توب أعيط وأعيط
وسمر تهدي فيا وتضحكني
بتقولي فاكرة ياياسمين في فيلم اريد خلعا لما عبدالمنعم مدبولي بيقول لاشرف عبد الباقي أنا عاوز منديل
قام ادالو منديل عادي
قالو لا انا عاوز من المنديل أبو ريحة
انا افتكرت اللقطة قعدت اضحك وانا بعيط
ومن هنا بدأت مرحلة التهييس
هدينا البرنامج وبنيناه من أول وجديد
وقعدنا نشتغل وحدة وحدة
وكل شوية نشوف الارور ونقعد نضحاااااااااك
وياسلام لما نعرف نحل الارور بقى نكافىء نفسنا ونروح نجيب حاجة من عند عم فتحي
بعد شوية زهقت قلت لها تعالي نخرج برى نتمشى وبالمرة اتصل بالبيت عشان احنا الاتنين معناش كريديت
رحنا عند الراجل اللي هنتكلم من عندو
كنا قبلها بيوم مكلمة البيت قال لي بنها برضو
قلت لا ياعم النهاردة موبايل عشان تاخد نص جنيه بس
بعد ما اتصلت
قلت لو معيش فكة معايا عشرة جنيه
اداني فكة خدت الفكة وكنت همشي من غير ما ادفعلو حاجة
لقيت سمر ميته على نفسها من الضحك وبتقولو أصلها مابتحبش تدفع مش بتقول لك نص جنيه بس كفايه عليك
اكلمت من الموبايل بتاع الراجل وخدت منو تسعه جنيه ونص وهمشي
الراجل ضحك وعداها
واحنا داخلين بتاع الأمن واقف انا دخلت من غير ما ابص لو فبيقولنا على فين
قلت لو رايحين الكليه قال يعني فين
وفي نفس واحد انا وسمر ( حاسبات ) قال طيب طيب اتفضلو اتفضلو
حتى بتاع الأمن هييس وقرر يحترمنا ولا ايه ؟؟؟؟؟؟؟
الجامعه فاضياااااااااااا مفيش حد أصلا غير بتوع حاسبات بس
قصاد حاسبات تلاقي زحمة وعربييات راكنه وجوا الاكستنشن امم بشريه
وناس مهيسه وناس بتضحك وناس بتعيط
خرجنا في الجنينة برى وعماله اقول لسمر تعالي اصورك جنب الورود الحمره دي بس مكنش فيه نور حلو ومعرفتش أصورها حلو ياخسارة
روحنا سألنا عم فتحي الكليه بتقفل امتى؟؟ احسن ينسونا في الجامع ولا حاجة
الساعه جات تمنية ولازم نمشي من الكلية كان ناقص لنا حاجه واحدة بس
قررنا ان احنا نفكر فيها كل وحدة تفكر لوحدها ولو وقفت معانا أوي نسال اي معيد يوم الخميس أو عالسايت أو أي حد
واحنا في محطة المترو حالة التهييس كانت جايبة اخرها
والناس تبصلنا وتحمد ربها على نعمة العقل
كان يوم حلو أوي نظمنا فيه البروجكت جدا
وهييست فيه جدا
لأني مفيش قدامي غير حاجتين يا اعيط والعياط مش هيحل حاجة
يا اضحك والضحك برضو مش هيجيب نتيجة
يبقى اروح لمرحلة وسط اللي هيا التهييييييييس
شفتو الحكم
بس الحمد لله انجزنا

أثرو فيا (1)

النهاردة افتكرت ناس كتير أوي كان ليهم تأثير علي بشكل كبير

طبعا هما كتييييييييييييييييييييييييير أوي
لأني بعتبر إن أي شخص بقابلو وبتعامل معاه أنا بستفيد منو وبيأثر فيا

بس أنا بتكلم عن التأثير القوي

نبدأ بقى

اول حاجة طبعا بعد بابا وماما

أولا ::استاذ عمرو خالد

طبعا استاذ عمرو غني عن التعريف

هوا اكتر انسان بيهزني أكتر انسان بتأثر جدا جدا لما بسمعو

ومهما الناس قالت عنو ومهما الناس هاجمتو أنا هفضل أسمعلو ومش هغير رأيي فيه

ابدا ابدا ابدا

لأنو استاذ عمرو خالد هوا اللي ربانا

من وانا في أولى اعداي وأنا بسمعلو وانا مقتنعه جدا بكل كلامو

انسان كبرت على ايده

وحاجة كبيرة أوي أوي أوي بالنسبة ليا

وزي ما استاذ مصطفى حسني قال عنو

قال استاذ عمرو خالد ده شيخنا وحبيبنا وأستااااذ

وشــــــــــرف لنا كلنا

ربنا يخليه ويحفظه ويجمعنا معا في الفردوس ان شاء الله

ثانيا:: استاذ مصطفى حسني

مش عارفه ليه لما بسمع لو اي درس بحس بطاقة غريبة

بحس ان انا حكون انسانه أفضل

فهمت أوي منو معاني جميلة في الحياة

وقد ايه الحياة جميلة واحنا قريبن من ربنا

صحيح انا في البداية ماكنتش بسمعلو خالص ومكنتش حتى عارفة أحفظ اسمو

بس دلوقتي بحاول قدرالامكان اطبق كل الكلام اللي بيقولو عشان أعيش في الحياة صح

بحب أوي تتر البرنامج الجديد بتاعو

وبالزات العبارة دي

( عايز تعيش وماتندمشي.. عالسنة والقران امشي.. عينيك تشوف الصورة أوضح)

ثالثا :: دكتور طارق السويدان

ولو اني بقالي كتير ماسمعتلوش حاجة

بس أنا مش هنسى أبدا سلسلة الأئمة الأعلام اللي عرفت فيها كمية معلومات كبيرة

أو سلسلة دعوة للنجاح

وبرامج كتيرة ليه يمكن ما تابعتهاش بشكل منتظم

بس دا مايمنعش انو غير جوايا حاجات كتير أوي

طبعا كل السابقين الذكر دول شخصيات عامة

طبعا من الناس اللي مش معروفين غير بالنسبة ليا

فيه :: دكتورة نور قاروت

دكتورة في جامعة أم القرى وهيا المسؤوله عن تحفيظ القران اللي انا كنت بروحو في مكة

انسان رائعه متواضعه جدا فقيهة بمعنى الكلمة علمتني حاجات كتير أوي أوي

عرفت معاها يعيني ايه زهد ويعني ايه تواضع ويعني ايه حب في الله ويعني ايه تضحية

من غير ماتقول خطب كل ده اتعلمتو منها بمجرد المعاملة فقط

**********************************************

وطبعا مدرسات التحفيظ كلهم بس على وجه الخصوص الأستاذة بشرى

دي اللي حفظت القران على ايديها

ودي اللي اتعلمت منها حاجات كتير أوي غير حفظ القران

غرست فيا اني احافظ على مبادئي واني أكون مؤثرة وليست متأثرة
ويعني ايه اكون معتزة بديني

وده فادني كتير أوي فحياتي ويمكن ساعة ماكنت بتقول لنا الكلام ده ماكنتش حاسة بأهميتو

لكن أنا دلوقتي استفدت جدا جدا من نصائحها

وبدعيلها من أعماق قلبي ان ربنا يوفقها ويخليلها أطفالها وينبتهم نبات حسن

***********************************************

وطبعا مش هنسى جارتنا العزيزة دكتورة ماجدة

دي زي خالتي بالزبط

ومن وانا في سنة تانية ابتدائي واحنا جيران

كنت بحب اتكلم معاها

ادتني شريط للاستاذ عمرو ودي كانت أول مرة أسمعو فيها

كانت هيا مصدر تلات ارباع الكتب اللي قرأتها والشرايط اللي سمعتها

بحس دماغها عاليه جدا وبقتنع جدا بالكلام اللي بتقولو

واتمنى اني في يوم من الأيام اوصل لعقليتها بسم الله ماشاء الله عليها

*******************************************

صديقتي الصدوقة هوازن :D

من جد ياهوازن أنا من غيرك ولا شي

يكفي انك ( انا )

ويكفي كدة عشان الغيرة :P:P:P

**************************************

أنتيمتي فطوووووووووووم

حبيبة قلبي والله وحشتني البنت هذي

ووحشتني الايام الحلوة اللي قضيناها مع بعض

من جد كانت أجمل أيام عمري ومن جد أيام ماتتعوض

فطومة لو اقعد من اليوم الين بكرة أكتب عنك مارح أوقف ومارح أقول كل اللي في قلبي

ما اقدر أقول غير الله يوفقك في حياتك ياااااااااااارب

والله يجمعنا في جنة الفردوس زي ما اتجمعنا في الدنيا

وطبعا باقي الشلة المصونات * وجنان الثنوي*

سارونا

مع انك دايما تكذبين عليا وتسوين فيني مقالب بس احبببببببك والله
والله يوفقك في حياتك ويمكن لما تتزوجي تعقلي

وياويلك ماتعزميني ووالله العظيم ما حكيتيني عن يوم الشوفه

<<< مصممة

************************************

مرمريتا

عارفه يامرامي اني اتعلمت منك ( فن الاستمتاع بالحياه)

أو أحاول اقلدك يعني في هدا الشيء

وهدي أول مرة أعترف لك فيها بس والله أحببببببببك واتعلمت منك اشياء كتيرة

ونصيحة مني

حافظي على ابتسامتك الحلوة وروحك الجميلة

************************************

ندوش

وش اقول وش أخلي بس من جد ياندوش تعجبيني لأنك وفيه ومخلصة وتتذكريني دايما

مو زي بعض الناس
الله يوفقك ويريح بالك :P

وتعقلي كدة وتهجدي وتبطلي صراخ على اخواتك والله حرام أطفال وش ذنبهم

من جد ياندوش بدعي لك كتير والله

***********************************

على فكرة مرتبتكم ابجدي ( س, م,ن ) :D:D:D:D:D:D

حاسة ان البوست ده طول أوي فكفاية كدة

وهكملو في بوست تاني

بابا قال لي كدة

كل ما اتناقش مع حد من اصحابي
لازم اقول العبارة دي
بابا قال لي كدة :D:D
وبالزات لو عاوزة أأكد المعلومة بقى
لدرجة ان دلوقتي صحباتي لما يسألوني عن حاجة واقول رأيي يضجكو يقولو بابا اللي قال لك كدة؟؟
ما كنتش حاسة بأني بتكلم عن بابا كتير بس لما ركزت مع نفسي لقيت ان أصلا مصدر 99 % من معلوماتي هوا بابا
لأني بصراحة كنت بكسل اقرأ واقعد أسأل بابا لأنو هوا هيقول لي المعلومة بطريقة سهلة وكمان هتبقى معلومة موثوقه
:D:D:D:D

لدرجة ان مرة وانا اصحابي بنتكلم قامو بيتكلم عن العدوان الثلاثي
قلت لهم مصر ساعتها ماحاربتش وهما اللي مشيو ساعتها مش عشان خافو مننا عشان سبب تاني أنا مش فاكراه
شيماء صاحبتي قالت لي اه مشيو عشان سواد عينينا وكانت متنرفزة أوي مني
قلت لها والله انا متأكدة انهم مشيو عشان حاجة أنا مش فاكراها بس هوا (بابا قال لي كدة)
وبقولها ببرووووووووووووووود
شيماء قالت لي انا هيجيني شلل منك
قلت لها ما تصدقيش كتب المدرسة لأن بابا قال لي .......... بس هيا مارضيتش تخليني أكمل
وقعدت تزعق
ماعلينا مش هوا دا موضوعنا بس انا قلت الشاهد ده عشان أبين قد ايه بابا ده حاجة كبيرة أوي بالنسبة ليا:)
طبعا لأني من وانا صغيرة حتى لما كنت اسأل ماما عن أي حاجة بتقول لي اسألي بابا
لأني كنت بسأل كتير وبسأل اسأله عجيبة وبابا بصراحة يستاهل جايزة نوبل لأنو كان بيستحمل رخامتي
لأني دلوقتي ما بستحملش الأطفال اللي بيقعدو يسألو يسألو
وشكلي كدة هبقى زي ماما همشيها نظام روح اسأل بابا
لما كنت مثلا بتصفح في النت وواقرى معلومة غريبه اسأل بابا عليها
لما مدرسة عندنا في المدرسة تقول لي حاجة كدة أنا مش مقتنعه بيها لازم أول ما اروح اسأل بابا عليها
انا لسة فاكرة ان مرة مدرسة دين سألتنا سؤال اضافي وبعدين أنا سألت بابا
وتاني يوم لقيتها قاعدة في غرفة المدرسات قمت قلت لها على الاجابة
سألتني سؤال بديهي
جبتي الاجابة بقى من انهي كتاب
قلت لها من ( بابا) قالت لي و(بابا) جاب المعلومة منين
قلت لها لا هوا (بابا )عارف المعلومة دي أصلا
قالت لي بس دي مايعرفهاش الا متخصص قلت لها ما(بابا) دارس دين
فهيا تخيلت ان ده مؤهله الجامعي

وفي نفس الوقت مدرسة الأحياء دخلت وبرضو كانت سالاني سؤال وبرضو انا سألت( بابا )
وجاوبني بصفتو طبيب يعني
ونفس الحوار السابق
قامت مدرسة الدين قالت لي (بابا) بيشتغل ايه بالزبط ياياسمين
قلت لها بيشتغل( بـــابـــا) :D:D

أحلى حاجة في الدنيا انك يكون عندك حد يقدر يجاوبك على جميع التساؤلات اللي في راسك
أجمل حاجة انك تقعدي تتكلمي مع بابا ساعتين تلات ساعات تاخدي منو خلاصة تجرتو وخلاصة حياة هوا عاشها
أي نعم كنت ساعات كتير بقاوحو
وما اقتنعش بالكلام اللي بيقولو
بس بعد تجربة لا تقل عن 18 سنة
اكتشفت ان اي حاجة بابا يبقى يقولهالي هيا صح مية في المية
ومن غير ماتقاوحي ياياسمين
أنا فاكرة واحدة صاحبتي كانت بتحسدني على بابا :)

يمكن أنا بكتب الكلام ده دلوقتي عشان انا بعيدة عن بابا
وامنيتي اني اقعد معاه زي زمان
ويسألني سؤالو اليومي بعد مايرجع من الشغل
هاه ايه الأخبار ؟؟
وأختكو تقعد ترغي ترغي ترغي

بس يلا هانت كلها شهر ونص واروح وأقول لو على كل الأخبار :D:D:D

ماباليد حيلة والله

سلامو عليكو

ازيكو ياجماعه

ان شاء الله كلو تمام

اصحابي عمالين يزلو فيا من ساعة ماعملت البلوج ده:$

وبصراحة ليهم حق

لأنو مالوش أي لزمة :D:D:D

وجودو زي عدمو يعني ماكتبتش فيه اي بوست أقابل بيه ربنا :D:D:D

بس والله أنا حاسة اني محتاااااااااسة جدا

الإمتحانات تطرق الأبواب

وأنا شبه معرفش حاجة عن مواد كتير

واللي زاد وغطا

البروجكت اللي نزلت دي :'(

وربنايستر

حاسة اني ضيعت وقتي جدا :'( :'(

ومتوترة ومش عارفه أكتب حاجة

بس هيا الامتحانات تخلص وأناازبطكو

دعواتكو بقى

اني انجح بس السنة دي وأعدي كدة صافي

ربنا ينجحنا كلنا يارب :$